台中市台灣語文研究社（註1）在1994年的7月歇熱，在北屯區的利巴嫩山莊遊樂營區，舉辦第1屆台語文學營3工。我才第1擺和敏雄博士熟識，有1次下課的時陣。我有向敏雄博士講：「我有寫1篇文章叫做『暗時的後窗』，內文咧評算罵恁這黃皮膚、白人思想的芎蕉人；飲台灣水、吃台灣米，卻是找真齊理由來對台灣家鄉忘本、無做出半絲仔奉獻。」
彼當陣敏雄博士真激動，伊用正手按我的正手，閣用醜（左）手來抱我的正手。嘴講：「有理，罵了足好、罵了真對。」當時互我感受著伊的土直硬氣、真性情的1面。事實上，在1993年3月伊轉來咱台灣進前，伊就在米國的德拉威州做過台灣同鄉會會長，跟FAPA（喊打外來佔領者之意）的分會長，以及台灣學校的校長，用正版行動來進行愛台灣的建國運動。
會記得，伊整理在3民路3段台中公園邊舊厝，這落厝是古早型1樓閣增建1個半樓拱的透天厝，這是伊的老爸開1間擠火（蔴）油的油車店（註2）。重新請隔欲開業「台灣本土文化書局」用的，大概就是隔轉年去米國辭掉服務28冬久，米國的3大長程固體火箭發射研究中心之1的頭路。…直直舞到冬尾才籌備齊全開始營業，來鬥推使（駛）台灣本土文化的運動。
1992年正義老師就提供伊莒光國宅的厝，家己的文化咖啡店教台語拼音，教學1暫時間了後，才閣改做台語文寫作會（註3）。彼段期間，正義老師鼓勵每1個學習者，每月日1人寫1篇字型、字數跟文體無限，閣用台語來表達寫出來。每擺量其約有10篇，才影印訂做1本。正義老師閣自費送互每1個到場的人，大家才來公家唸讀研討。
等創作的台文作品成熟，才開始試投台文通訊，後來嘛有唸讀江卻基金會提供的台文通訊，文字才慢慢約定成熟起來。一直到本土文化書局成立，才隨徙過來改做台文通訊讀者聯誼會，每個月唸讀台文通訊的文學作品。本土文化書局每禮拜三暗時嘛有黃昭堂博士、許世楷博士等前輩主持的民主專題演講會，帶動民主論壇滾絞鬧熱的氣氛。…後來台中文化學院在合作大樓成立，敏雄博士才去接教務主任的職務，伊嘛加真充實無閒。
有1回台中1中學校欲辦擺攤（園遊）會，講未使擺民主政治等台灣本土的冊，敏雄博士就和一陣1中台語社的學生，提抗議的海報去學校抗議，結尾有允准伊去擺冊擔推廣。
有1次我參伊開講。我講：「中國人顯可惡，1日到暗、1年通天攏咧不斷恐嚇咱台灣人，講咱若不和伊統一，就欲用武力來攻打、血洗解放咱。我閣講您那不去中央科學研究院，幫忙發展中程、長程雄風飛彈。」伊隨應我講：「若互我落去做，祇要有人、設備跟有物件，我有法度在3年內底做出1粒飛彈。但是，我不幫忙獨裁者控制的政府去發展飛彈武器。」
我閣講：「這層代誌重點無同款，這是關係著咱2000外萬台灣人的生存跟活路問題，愛不得已去配合伊做。」伊隨應講：「獨裁者控制的政府，伊會保護伊家己的私利。伊未踦在台灣人的觀點去做代誌；伊會按怎使用武器、用對叨位去，咱攏無法度去料想跟按算會著。所以伊真堅持伊『不』去配合伊做。」
敏雄博士有講伊在米國滯28冬，攏保持吃台灣米，伊講吃麵粉類未慣習。但是依2個查某子愛吃麵粉類，反到轉吃米吃未合舒（適）。所以伊嘛講：「後嘛伊的2個查某子，無可能轉來滯咱台灣，因為吃食確實會影響著適應的思考問題。」
有1擺伊讀大學的查某子歇長假轉來，參阮同齊去苗栗參加參觀「華陶窯」的旅遊。伊的查某子參阮講話，定定聽著聽無的台語去喘（嚇）1著，因為伊在米國的厝內，抑是和台（灣）美（國）人鬥陣，規工攏總講台語無問題。那會知影和阮大家講台語，不三時會講著伊不識聽過的台語詞句。後來才了解所接觸的人，攏講相同範圍的語詞和腔口，1時無法度適應過來。
爬山行到半路在牛樟仔樹腳休睏，…笑談中間看著生態魚池，有和伊的查某子講對海翁去。伊續聽無就走去問紀博士：海翁是啥麼物件。紀博士嘛講海翁的英語伊嘛未曉。才在紙的面頂畫出海翁的形狀，才閣用字典去查著海翁英語就是whale。嘛聽冊局的余姑娘講：「敏雄博士有1個查某子，決心想欲做修女，不知叼1條腸去相趴著的因由，續去嫁著1個意願欲做神父的白人做翁婿。」
冊局的內底隔間的壁邊，有擱1卡日本佔領時期所留落來，是暗綠色的中型金庫。這種是古早大生利人才有咧用的物件。一般小生利人攏用桌頂閹一遭橫孔的通鑎仔擱錢入去，可見伊的爸母財力未歹。我就家婆問敏雄博士講：若不打開看嘛？反勢內底有重要的金銀財寶、金珠瑪瑙跟田園厝契。紀博士講：「有去叫打鎖匙店的師傅來開」。彼師傅講：『現代的金庫咧轉旋的號碼鎖，號碼找著孔就是內底面會用發條自動彈出1崁，跟古早用絞齒的機械式用栓仔擠的才力無同款。除非用瓦斯割開，內底有1層防火層未傷著內底的物件。…才閣燒黏起來補土漆色、閣換現代鎖覆回原樣來復原。』…真費氣，致使無處置。」
我閣問講：「不過，如果內底的物件，若是真有價值性的國寶級的物件，咱這代人若無用心發落，到下1代人不識寶，當做畚圾稱斤賣掉，彼不是變做真打損的代誌。」我的意思是講您的子弟攏在外國咧討吃，1代過1代、免3代人，就完完全全變做當地人的思想，台灣祖國的印象變做1個通常名詞，就無啥感情意義來慢慢淡忘消失去。到路尾伊講的話意是：等有1日有心，抑是有想欲處理才去處理就好。…（註4）
敏雄博士開冊局的第3冬，去發現著著大腸癌的第3期，伊講本來放黑屎（血液接觸空氣會自然變黑），伊無注聞去斟酌著，後來嚴重閣去米國治療，冊局就放互的外甥女余姑娘顧店。欲去米國治療的進前日，伊有叫我去結代賣2本書的帳款，攏總幫我賣「暗時的後窗」跟「追求永遠的物件」計28本（註5） 。
…彼個期間我識問伊講：對死亡的看法跟心態。伊講人若著著大腸癌，到末期攏存無幾冬通好活，伊攏有心理準備去看開，未驚慌嘛未感覺人生有啥遺憾。敏雄博士講彼當初欲去留學，當等飛機起飛了後，伊就決心不轉來互蔣家獨裁政府控制的家鄉，後來到吃老牽黏著思鄉跟親情，以及抱著奉獻家鄉的心情回鄉。因為爸母早著過身，伊無早期留學生加入台灣獨立聯盟，互列入黑名單束縛，致使未當轉來見爸母最後1面，跟喉管巔的彼類問題。
有1擺敏雄博士招我去台中技術學院（中華路）邊仔的巷仔底的公寓，彼是正房的兄姊攏滯無同層的樓仔厝，規家人無因為分開尚久，同樣保持真和諧的款曲。
…敏雄博士識跟我透露：伊講前後鏤（投）300外萬塊銀落去冊局。不過，我看伊時常話句無齊。但是滿面春風活甲真充實、歡頭喜面真喜樂圓滿，有追求著伊想欲追求的物件的，彼種浸在日思夜夢的家鄉懷抱的滿足感覺。
＊ 附記：1. 台中市台灣語文研究社在1994.6.20第1期報紙型雜誌（1大張）出刊 –歷任理事：蕭興隆、張秀鸞、曾正義、曾敦香、陳延輝、朱美英、賴妙華、張光裕、楊照陽、…計出刊19期雜誌。…藏書千冊寄擱在仁和路羅倫檭外科醫師家。
2. 擠火（蔴）油的油車店：店頭兼工廠。火油就是土豆油；蔴油就是黑蔴子抑是白蔴子擠出來的油。存的厚度2先×圓度50先（公分）的圓型糟粕做豆餅，絞碎飼六畜精牲抑是拽落田做肥料底。…店頭本來是淑賢的外公的第2個某滯的所在，第3個某是滯神岡區。
3. 台語文寫作會：正義老師真有智慧跟堅持理想到今嘛，免費飲咖啡、完全免費教學，培養真齊台文作家。包括伊的支薪助理-客語文作家江秀鳳、楊照陽、張聰敏、曾敦香、賴妙華 …等。正義老師有翻譯「林肯傳」「富蘭克林傳」「茶花女」…等是中部地區的台語文的啟蒙祖師。
4. O賢講：「金庫還無打開過，保持原封不動擱原位。」
5. 楊照陽2本書「暗時的後窗」跟「追求永遠的物件」，本土文化書局攏總賣28本的書款，我了解經營書局的艱難歹依持，我自動提議閣換買店內的本土冊。
6. 敏雄博士參與利巴嫩山莊文學營的全體相片是照陽仔提供 -1994年台中市北屯區)
